Өзгөн районунун Мырза-Арык бала бакчасында жаңы жылдык белектин чуусунан улам ата-энелер жыйын өткөрүштү

Өзгөн районунун Кароол айыл аймагына караштуу Мырза-Арык бала бакчасында жаңы жылдык белектин чуусунан улам ата-энелер жыйын өткөрүштү. Бул тууралуу бүгүн, 3-январда SUPER.KG порталына бала бакчанын башчысы Астра Чыйбылова билдирди.

Окуя 29-декабрда окурман "Элдик кабарга" "Бакчадагы балдарыбызга жаңы жылдык белек алып берүү үчүн 300 сомдон акча чогултушкан. Берген белектери 100 сомго да жетпейт. Ата-энелер буга нааразы" деп билдиргенден улам башталган.

"Элдик кабарга" келген маалымат жарыяланган соң Өзгөн райондук билим берүү бөлүмүнүн башчысы Ысмайыл Дүйшөев "Жаңы жылдык белекти ата-энелер өздөрү жасашы керек болчу. Эгерде тарбиячылар балдарга жаңы жылдык белектерди даярдап берүү үчүн акча чогултушкан болсо, анда бул ишти мен жергиликтүү укук коргоо кызматына өткөрүп берем" деген жообун берген.

"Бүгүн, 3-январда жумуш күнү башталып, Кароол айыл аймагынын башчысы, айыл аймактын социалдык иштер боюнча адиси жана ата-энелер катышкан жыйын өттү. Жыйында Жаңы жыл алдында балдарга берилген белектин чуусу талкууга алынды. Ата-энелер 29-декабрь күнү балдарына алган белектер үчүн нааразы эместигин айтышты. Ал тургай түшүнүк кат жазып беришти. Жыйынга жалпысынан 52 ата-эне катышты", - деп билдирди Чыйбылова.

Маалыматка ылайык, балаты майрамында 100 балага белек берилген. Ал үчүн ата-энелер 300 сомдон акча чогултушкан. Ал эми аз камсыз болгон жана ден соолугунун мүмкүнчүлүгү чектелген 9 балага акысыз белек таратылган.

"Балдар үчүн 226 сомго жаңы жылдык белектер алынган. Калган 74 сом жол акысына жана белекти таңгактагандардын эмгек акысына кармалып калган", - деп кошумчалады бала бакчанын башчысы.