"Стамбулдагы кол салууга шектелген жаран" деп жарыяланган паспорттун ээси теракт жасалган күнү Кыргыз Республикасында болгонун айтууда

Бүгүн эртең менен түркиялык басылмалар Стамбулдагы кол салууга шектелген адамдын паспортунун сүрөтүн жарыялашкан. Паспорт 1988-жылы туулган Йахье Машрапов (Iakhe Mashrapov) аттуу жаранга 2016-жылдын 21-октябрында Кыргыз Республикасынын Мамлекеттик каттоо кызматы тарабынан берилген. Бул маалымат интернетке чыккан соң, УКМК кызматкерлери Йахье Машраповдун жашаган жерин аныкташкан.

"УКМКнын Кара-Суу районундагы кызматкерлери Машраповду үйүнөн алып келишип, суракка алышты. Толук маалыматты иликтөө иштеринен соң беребиз", - деди УКМКнын өкүлү Рахат Сулайманов.

Ал эми Йахье Машрапов жергиликтүү "Турмуш" басылмасына берген маегинде окуя катталган күнү Кыргыз Республикасынын аймагында болгонун жана Стамбулдагы терактка эч кандай тиешеси жок экенин айткан.

"1-январь күнү соода иштерине байланыштуу Стамбулга баргам. Кайра Бишкекке учканы жатканда Түркиянын укук коргоо органдары "Стамбулдагы кол салууга шектелген адамга түспөлдөш экенсиң" деп бир саат суракка алышты. Андан соң кечирим сурап коё беришкен. Бүгүн эртең менен Бишкекке учуп келип, кайра Ошко учуп кеткем. Менин паспортумдун сүрөтү кандайча интернетке чыгып кеткенин билбейм", - дейт Машрапов.

Айта кетсек, 31-декабрдан 1-январга караган түнү Стамбулдагы "Рейна" түнкү клубуна курал менен кол салуу болгон. Ошол учурда клубда 500дөн ашык адам болгон. Анда 39 адам каза болуп, 70ке жакын адам ар кандай жаракат алган. Каза болгондордун арасында Орусиянын, Бельгиянын, Франциянын, Индиянын, Ирактын, Сауд Арабиянын жарандары да бар. Ал эми "Ислам мамлекети" террордук тобу бул кол салууну уюштурушканын билдирди.