Түркияда сабалган кыргыз кызга чоң атасы барып, ал аз-аздан эсине келе баштады

2-январь күнү Түркияда сабалган кыргыз кыздын жанына чоң атасы барды. Бул тууралуу SUPER.KG порталына Стамбулдагы Кыргыз өлкөсүнүн консулу Руслан Молдакунов билдирди. Ал эми кыздын атасы редакциябызга төмөнкүлөрдү айтты:

"Кызымдын сабалып, ооруканада комада жатканын 28-декабрда уктум. Ошондон бери абалым жакшы болбой жатат. Тилекке каршы, жалпы жарандык паспортум жок болуп, аны жасатууга туура келди. Майрам күндөргө да туш келип калып, документтерди кеч тапшырдым, паспортум колума тиет. Жубайыма билет алып койдук, буюрса, ал дагы учат".

Ал эми Стамбулдагы мекендештерибиздин айтымында, сабалган 21 жаштагы М.Н. учурда акырындык менен эсине келе баштаганын билдиришти. Маалыматка ылайык, консулдуктун бир кызматкери жабыр тарткан кыздын жанында. Чоң атасы маал-маалы менен небересин барып көрүп турат. Учурда ал Стамбулдагы мекендештин үйүндө убактылуу жашап жатканы маалым болду.