Бишкек мэриясы: "Акча алмаштыруучу жайдын кызматкери таштанды таштоочу урнаны даараткана катары колдонуп жүргөн"

4-январь күнү Бишкек шаарындагы Манас кең көчөсү жана Киев көчөсүнүн кесилишинде жагымсыз окуя катталган. Анда шаардагы акча алмаштыруучу жайлардын биринин кызматкери полиэтилен баштыкчага заара ушатып, кайра "Тазалыктын" кызматкерлеринен анын артынан жыйноосун талап кылган. Бул тууралуу Бишкек шаардык мэриясы бүгүн, 6-январда билдирди.

"Кызматкерлер бул убакта өз жумуштарын жасап жатышкан. Алар өз дарегине бейтааныш эркек тараптан мындай мазактоолорду күтүшкөн эмес. Окуя болгон жайга дароо Санитардык-экологиялык инспекциянын кызматкерлери барышып, буга чейин да таштанды таштоочу урнаны даараткана катары колдонуп жүргөн жарандын ким экенин аныкташкан. Коомдук тартипти бузган Г.Сга административдик жоопкерчиликке тартуу боюнча протокол түзүлгөн. Ал күнөөсүн мойнуна алып, мындан ары тартипти сактаарын билдирген", - деп айтылат маалыматта.

Буга байланыштуу шаардык муниципалитет тургундарга мындайча кайрылган:

"Урматтуу шаардыктар, "Тазалык" ишканасынын кызматкерлеринин эмгегин сыйлоону өтүнөбүз. Алар жамгыр, суук, аяздуу жана аптаптуу күндөргө карабай эмгектенишет. Андыктан коомдук жайларда тазалыкты сактап, таштандыны көрүнгөн жерге таштабай, санитардык эрежелерди сактоону суранабыз!"