Кочкор-Ата шаарында балдарга карай ок атуу окуясы боюнча кылмыш иши козголду

Кочкор-Ата шаарында балдарга карай ок атуу окуясы боюнча кылмыш иши козголду. Бул тууралуу бүгүн, 6-январда Ички иштер министрлигинен билдиришти.

Маалыматка караганда, окуя 31-декабрь күнү саат 00:30 чамасында Маданият үйүнүн жанында болгон. Анда белгисиз айдоочу Субару Легаси унаасы менен топтошкон балдарды сүзүп кете жаздаган. Буга ачууланган балдар айдоочу менен уруша кетишкен. Ошол учурда унаанын ичиндеги белгисиз адам ок атуучу курал менен биринчи жерге, анан балдар тарапка ок аткан. Анын кесепетинен 1993-жылы туулган Ж.Т. бетинен жана 1992-жылы туулган А.К. башынан жараат алган.

Бул факт боюнча кылмыш иши козголуп, шектүү катары 1983-жылы туулган С.Г. жана 1975-жылы туулган Э.Г. кармалган. Учурда алар убактылуу кармоочу жайга киргизилишти.