Намаз убагы келип, бейтапты кабыл албай калганы үчүн дарыгер кечирим сурады

Кара-Суу районундагы аймактык ооруканада намаз убагы болуп калганына байланыштуу бейтапты кабыл албаган дарыгер бейтаптын туугандарынан кечирим сурады. Бул тууралуу туугандарынын бири Хулькар Исамова билдирди. Анын берген маалыматы боюнча, окуя кечээ, 8-январда болгон.

"Намазга шашкан дарыгер менин туугандарыма чейин 20 баланы кабыл алганын, намаз окуганга убакыт берүүсүн суранганын айтты. Ооруп жаткан кыз өз эсинде, активдүү отурганын көргөнүн да кошумчалады. Оорукананын директору бейтаптар жана алардын ден соолугу биринчи орунда экенин белгилеп, дарыгер менен сүйлөшкөнүн айтты. Дарыгер кечирим сурады", - деген Исамова. Ошондой эле ал окуя боюнча эки тарап келишип, бирдиктүү чечим чыгарышканын кошумчалаган.

Эскерте кетсек, талма оорусу менен ооруп, тез жардамга муктаж болгон баланы дарыгер намаз убагы болуп калганына шылтоолоп кабыл албай койгону жазылган.