Азимжан Аскаров: "Мен күнөөлүү эмесмин, күнөөм болсо Кудай жазаласын"

Бүгүн, 10-январда Чүй облустук соту Азимжан Аскаровдун ишин карап жатат. Мурдагы сот отурумунда жарыш сөздөр айтылган эле. Бүгүн кыстырмалар айтылып, жактоочулар Аскаровдун мыйзамсыз кармалып, кыйноого алынганын баса белгилешти. Ошондой эле соттон акыйкат чечим чыгарууну суранышты. Ал эми айыпталуучу Аскаров: "Мен күнөөлүү эмесмин, күнөөм болсо Кудай бул жашоодо жазаласын. Сот ишти объективдүү карап, туура чечим чыгарат деген үмүттөмүн", - деди.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.