Шаар тургундары Айни жана Токтоналиев көчөлөрүнүн кесилишиндеги курулуш иштерине каршы чыгышты

Бишкек шаардык мэриясынын имаратынын алдына "Шаардык демилгелер" коомдук фондунун мүчөлөрү жана шаар тургундары калаадагы эс алуу бактарындагы дарактарды кыйып, курулуштарды жүргүзүп жаткандарга каршылык билдирип чыгышты. Бул тынчтык митингине 20га жакын адам чогулган.

"Жакында Айни жана Токтоналиев көчөлөрүнүн кесилишиндеги эс алуучу жайда 50дөй даракты "Жашылдандыруу" ишканасы кыйып кетти. Ал жак балдар ойноочу жай болчу. Биз буга каршыбыз. Ошондой эле мындай кадамдарды токтотууну мэриядан талап кылабыз", - деп билдирди "Шаардык демилгелер" коомдук фондунун мүчөсү Атай Самыйбек.

Митингчилер 1 саатка жакын убакыттан бери плакаттарды көтөрүп, талаптарын айтып турушат. Азырынча мэриянын тийиштүү адамдары нааразы болгон эл менен жолуга элек.

"Балдар ойноочу жайды жана спорт аянтын бузганы жатышат. Биз аларды 2015-жылы сырдап, оңдоп чыкканбыз. Спорт аянтын бузууга жана дарактарды кыйганга каршыбыз", - дейт шаар тургуну Айканыш Дербишова.