Алтын жалатылган депутаттык төш белгилер боюнча тендердин жыйынтыгы жокко чыгарылды

Жергиликтүү кеңештин депутаттары үчүн алтын жалатылган төш белги жана кызматтык күбөлүктөрдү даярдоо боюнча тендердин жыйынтыгы жокко чыгарылды. Бул тууралуу 11-январда SUPER.KG порталына Борбордук шайлоо комиссиясынан билдиришти. Тендерге катышкан компаниялар жыйынтыкка макул эместигин билдирип, нааразычылык күчөгөндө БШК жыйынтыкты жокко чыгарууга аргасыз болгон. Эми кайрадан тендер өтөрү күтүлүүдө. Парламенттин бүгүнкү жыйынында депутаттар төш белгилерди алдын ала даярдатууга мүмкүн экенин айтышып, жөнөкөй ишти аягына чыгара албаган өкмөттү сындашты.

Эскерте кетсек, 2016-жылдын ноябрь айында Борбордук шайлоо комиссиясы 6,3 миллион сомго жергиликтүү кеңештин депутаттарына алтын жалатылган төш белги жана кызматтык күбөлүк сатып алуу боюнча тендер жарыялаган. Декабрда БШК тендердин жыйынтыгын чыгарып, жаңы 9000 депутаттын төш белгиси жана күбөлүгү үчүн 4,7 миллион сом жумшаларын билдирген эле. Катышуучулардын арасында 9 миң төш белгини 675 миң сомго жасап берүүнү сунуштагандары да болгон, бирок БШК негедир кымбатын тандаган.

Жергиликтүү кеңештин депутаттарын шайлоо 2016-жылдын 11-декабрында өткөн.