Кылмыш дүйнөсүндө "Дөө" каймана аты менен таанымал Чыңгыз Жумагулов 18 жылга кесилди

Кылмыш дүйнөсүндө "Дөө" каймана аты менен таанымал Чыңгыз Жумагулов Кылмыш-жаза кодексинин "адам өмүрүнө кол салуу" беренеси боюнча үй-мүлкүн конфискациялоо менен 18 жылга эркинен ажыратылды. Мындай чечимди Бишкек шаардык Биринчи Май райондук соту чыгарды. Бул тууралуу Жогорку Соттун басма сөз кызматы бүгүн, 11-январда билдирди.

Кылмышкерге "адам өмүрүнө кол салууну уюштуруу", "бийлик өкүлүнө күч колдонуу", "бейбаштык" беренелери боюнча айып тагылган. Ал эми Жумагуловдун жактоочулары Бишкек шаардык сотуна арыз менен кайрылышарын билдиришти.

Чыңгыз Жумагуловду 2016-жылдын апрель айында Бишкек шаарынын Чүй жана Курманжан датка көчөлөрүнүн кесилишиндеги ок атышууга катыштыгы бар деп колго түшүрүшкөн.

Тергөөнүн версиясы боюнча, Жумагулов жана анын шериктери Субару үлгүсүндөгү унаадан 1981-жылы туулган А.Д. аттуу жаранга ок чыгарышып, жыйынтыгында жабырлануучу жаракат алып Улуттук хирургия бөлүмүнө жеткирилген. Өткөн жылдын июнь айында Ч.Жумагулов из жашырып кеткендигине байланыштуу Биринчи Май райондук соту ага издөө жарыялап, сыртынан камакка алуу боюнча чечим чыгарган. Чечим чыккандан 1 аптадан кийин ал колго түшкөн.

Белгилей кетсек, Ч.Жумагуловду "Камчы Көлбаевдин уюшкан кылмыштуу тобуна мүчө" деп келишет. Ошондой эле ал президенттик аппараттын мурдагы башчысы (К.Бакиевдин мезгилинде. ред.) Медет Садыркуловдун өлүмүнө шектелгендердин бири болуп келген.

Жумагулов өзү криминалдык чөйрөгө катыштыгы жок экенин айтып, уюшкан кылмыштуу топторго мүчө экендигин четке кагып келет.