Бишкектеги Ататүрк атындагы сейил багында жардыруу уюштурган жаран кармалды (фото)

Бишкектеги Ататүрк атындагы сейил багында жардыруу уюштурган жаран кармалды. Бул тууралуу бүгүн, 12-январда Ички иштер министрлигинен билдиришти.

Маалыматка караганда, 2017-жылдын 4-январь күнү саат 04:41 чамасында Бишкек шаарынын Октябрь РИИБинин нөөмөт бөлүмүнө Ататүрк атындагы сейил бакта жардыруу болгону тууралуу маалымат келип түшкөн. Окуя болгон жерге дароо ыкчам топ барып, өсүп турган бактын белгисиз адамдар тарабынан тротил эквивалентинде күчү 200 грамм болгон колго жасалган жардыруучу зат менен жардырылганын аныкташкан. Бул боюнча кылмыш иши козголуп, кылмышка шектүү катары 1987-жылы туулган Е.Е. кармалган. Ал жашаган жерден ок атуучу курал, ок-дарылар жана химиялык кошулмалар, химия боюнча китептер табылган. Учурда ал убактылуу кармоочу жайга киргизилип, ушул сыяктуу башка кылмыштарга тийиштиги бар же жогу такталууда. Ошондой эле жогорудагы жардырууга катыштыгы бар делген адамдар изделүүдө. Кармалган адам 2014-жылдан бери Республикалык психикалык борбордо каттоодо турган. Мурда уурулук боюнча сот жообуна тартылган.