Ошто милициянын кашын жара тепкен ырчы күйөрмандарынан жана Ош ШИИБинин жетекчисинен кечирим сурады

Ошто милициянын кашын жара тепкен ырчы Алтынай Жайнакова күйөрмандарынан жана Ош шаардык ички иштер башкармалыгынын жетекчиси Кылычбек Жолдошевден кечирим сурады. Ал SUPER.KG порталына берген маегинде буларга токтолду:

“Ошол күнү мени эч кандай Патрулдук милициянын кызматкерлери тоскон эмес. Алар унааны кыз айдап бара жатканын көрүшүп, башка кызматкерлерге айтышкан. Анан алар кийинки көчөдөн токтотушту. Документтеримди алып бергиче болбой эле каткырып күлүшүп, шылдыңдашты. Анан тааныштарыма чалганга туура келди”.

Ошондой эле ал Ош шаардык ички иштер башкармалыгынын жетекчиси Кылычбек Жолдошевдин атын эмнеге атаганын түшүндүрүп берди: “Жолдошев менен эч кандай мамилем жок. Болгону аны сыртынан тааныйм. Анын атын айтсам, аз да болсо коркушабы деген ойдо болгом. Учурдан пайдаланып андан өзгөчө кечирим сурайм”.

Алтынай Жайнакованын айтымында, буга чейин журналистика тармагында бир аз иштеген. Учурда чыгармачылык менен алектенет.

“Учурда мыйзамды жакшы билген адамга кайрылайын деп жатам. Рулду бербей жатканда күчкө салып жүктөп кете беришсе болобу? Мени унаанын артына отургузушканда бүт кийимдерим ачылып калган. Ошол учурда алдыда отурган милиция кызматкери караган. Анан ага “караба” деп бутумду силккем”, - дейт ырчы.

Буга чейин интернетке убактылуу кармоочу жайдан чыккандан кийин концертке бара жатканы тууралуу видео тараган. Ал тууралуу буларга токтолду: “Ал курбуларымдын арасында тартылган видео болчу. Болгону алар менин көңүлүмдү көтөрүү максатында тартышкан. Кандайча тарап кеткенин билбейм. Эч кандай концертке барган жокмун. Учурда үйдө отурам”.

Айта кетсек, окуя 13-январга караган түнү Ош шаарындагы Масалиев жана Абдыкадыров көчөлөрүнүн кесилишинде болгон. Анда Алтынай Жайнакова өзүн журналист, эл тааныган ырчы катары тааныштырып, ар кимге телефон чалып Патрулдук милициянын кызматкерлерин коркуткан. Кийин унаасын айып жайга токтотуу үчүн алдына отурган Патрулдук милициянын кызматкеринин кашын арткы орундуктан буту менен жара тепкен. Анын үстүнөн "бейбаштык" беренеси боюнча кылмыш иши козголуп, убактылуу кармоочу жайга киргизилген болчу. Ал эми бүгүн Ош шаардык соту аны үй камагына чыгарган.