"Өзүнүн 3 жашар кызын зордуктаган" деп шектелип 29 жаштагы жаран камакка алынды

Бишкек шаардык ИИББи тарабынан Үсөн Сакатаев аттуу Ысык-Көл облусунун 29 жаштагы тургуну кармалды. Ал "өзүнүн 3 жашар кызын сабап, андан соң зордуктап салган" деп күнөөлөнүүдө. Шаардык милиция башкармалыгы билдиргендей, 25-апрелде Биринчи Май РИИБине 3 жашар кыз бирөө тарабынан сабалгандыгы жана учурда ооруканада оор абалда жаткандыгы тууралуу Улуттук госпиталдан маалымат түшкөн. Укук коргоо кызматкерлери ооруканага барганда кызды №3-балдар ооруканасына которушканын айтышкан. Жабырлануучу К.Э. бети бычак менен тилинген, кабыргалары сынган жана башынан алган жаракаты менен оорукананын жандандыруучу бөлүмүнө которулган. Бул иш боюнча кыздын апасы К.Фларида арыз жазган. Анын айтымында, 24-апрелде күйөөсү Үсөн Сакатаев Алматы шаарынан келип, алар жашаган Бишкек шаарындагы Мурас-Ордо жаңы конушунда достору менен спирт ичимдиктерин ичишкен. Мас болуп алып үйүнөн аялын сабап, эшикке кууп чыккан. Андан соң кызын эсин жоготкуча сабап, зордуктап салгандыгын айтат кыздын энеси. Бул факт боюнча аталган жаранга карата кылмыш иши козголуп, камакка алынды. Учурда териштирүү иштери жүргүзүлүүдө.