20-январда өлкө аймагындагы бардык мечиттерде учак кырсыгынан улам көз жумган маркумдарга арналып куран окулат

Кыргыз Республикасынын Президентинин 2017-жылдын 17-январын Кыргыз Республикасында аза күтүү күнү деп жарыялоо жөнүндөгү жарлыгынын негизинде Кыргыз мусулмандарынын муфтийи Максатбек ажы Токтомушев "20-январь - жума күнү өлкө аймагындагы бардык мечиттерде учак кырсыгынан улам көз жумган маркумдарга арнап куран окуп, дуба кылуу жөнүндө" буйругун чыгарды. Бул тууралуу бүгүн, 17-январда муфтияттын басма сөз кызматы кабарлады.

"Буйрукка ылайык, Кыргыз Республикасынын аймагындагы ар бир мечитте мамлекетибиздин тынчтыгы, элибиздин саламаттыгы үчүн жана кырсыктан көз жумган мекендештерибизге арналып куран окулуп, дуба, тилектер айтылат", - деп айтылат маалыматта.

Ошондой эле жабыр тарткандарга жардам көрсөтүү максатында муфтияттын түзүмүндөгү бардык дин кызматкерлери 1 күндүк эмгек акыларын которушат. Муну менен катар республиканын бардык аймагындагы жума намазы окулган мечиттерде кырсыктан жабыркагандарга материалдык жардам көрсөтүү максатында атайын кутучалар орнотулат. Топтолгон каражаттар атайын эсепке чегерилери маалым болду.