Баткенде эки жыл мурун ажырашып кеткен аялын таш менен башка чаап өлтүргөн жаран кармалды

Баткенде эки жыл мурун ажырашып кеткен аялын таш менен башка чаап өлтүргөн жаран кармалды. Бул тууралуу бүгүн, 17-январда Ички иштер министрлигинен SUPER.KG порталына билдиришти.

Маалыматка караганда, 2017-жылдын 15-январь күнү саат 10:00 чамасында Баткен районунун Бужум айылындагы Чет-Булак тилкесинин күн чыгыш тарабынан белгисиз аялдын жансыз денеси табылганы тууралуу маалымат түшкөн. Окуя болгон жерге милиция кызматкерлери барышып, каза болгон аял 28 жаштагы Чек айылынын тургуну Г.Т. экенин аныкташкан. Бул боюнча кылмыш иши козголуп, ыкчам издөө иштери жүргөн. Анын негизинде кылмышка шектүү катары маркумдун мурдагы күйөөсү, 34 жаштагы С.Э. кармалган.

Шектүүнүн айтымында, экөө борбордук базардан жолугушуп калышып, унаасы менен Чет-Булак тилкесиндеги талаага барышкан. Кийин ортолорунда уруш чыгып, Г.Т. намысына тийген сөздөрдү айткан. Анан намысына чыдабай таш менен бир нече жолу башка чапкан. Ошондой эле шектүү маркумдун сумкасын, телефонун сууга ыргытып, кыздарына алган боюмдарын жол четиндеги арыктын боюна таштап кеткен.

Айта кетсек, экөөнүн ортосунда 4 жаштагы эгиз кыздары бар.