Боинг кырсыгы: Авиакырсыктан каза болгондордун сүрөттөрү

2017-жылдын 16-январынын таңы кыргыз элинин эсинде, тарыхта эң каргашалуу күн катары калды. Бул күнү түркиялык учак кырсыктап, "Манас" аэропортуна жакын жердеги айылдагы бир нече үйдү бузуп кеткен. Анын айынан 4 экипаж мүчөсү, 34 тургун каза болду. Каза болгондордун көбү эне сүтү оозунан кете элек наристе, өспүрүм куракта болгондору калың элдин каңырыгын түтөттү. Бул күнү куткаруучулар, медицина кызматкерлери, ыктыярчылар күнү-түнү иш алып барып жатышты. Кырсыктаган тургундарга өлкөнүн алыскы аймактарынан баштап коңшу Казакстандагы Алматы шаарынын тургундарына чейин жардам колун сунушууда. Ошондой эле мамлекеттик бир нече ишканалар, анын ичинде "Супер-Инфо" гезитинин жана SUPER.KG порталынын эмгек жамааты бир күндүк айлык акыларын кырсыктан жабыр тарткандар үчүн атайын эсепке которушту.

Бирок кырсык тууралуу элди бөлүп-жарган, терс маанайда билдирүү жазган интернет колдонуучулар да пайда болуп, алар социалдык тармактарда катуу талкууга, сынга алынышты. Алардын бири Медициналык академияда окутуучу болуп эмгектенген Таттыгүл Дооталиева мыйзамга ылайык жумуштан алынган.

Жогорудагы сүрөттөгү жаш өмүрлөрдүн жалп этип өчкөнүн көрүп, аргасыз көзгө жаш келет. Араларында 4 айлык наристе, бир үй-бүлө мүчөлөрү, бир туугандар бар. Каза тапкан бардык 34 адамдын аты-жөнү бул жерде.