Боинг кырсыгы: Венера Дүйшееванын жана 2 уулунун сөөктөрү Ноокенде жерге берилди, балдардын атасы жандандыруу бөлүмүндө

Ноокен районунун Курулуш айылында Бишкектин четиндеги авиакырсыктан көз жумган Венера Дүйшеева жана анын 4 жаштагы уулу Алибек, 6 жаштагы уулу Исабек бүгүн, 18-январда жерге берилди. Бул тууралуу SUPER.KG порталына журналист Эмир Сариев билдирди.

Маалыматка ылайык, маркумдарды жерге берүү зыйнатына облус башчы Кыянбек Сатыбалдиев баштаган бир топ бийлик өкүлдөрү келишти. Облус башчы жакындарынан айрылган үй-бүлөгө көңүл айтып, президенттин атынан 100 миң сом, Жалал-Абад облустук администрациясынын атынан 70 миң сом акчалай жардам көрсөттү.

Кырсыкта мерт болгон үй-бүлө мүчөлөрү бир ай мурда иштеп каражат табуу максатында Бишкек шаарына келип, Курулуш башкармалыгынын дачалары айылынан ижарага үй алып жашап жатышкан. Маркумдун жолдошу Сатымбек Рахманов Сокулук районунда сүт ташыган унааны айдап иштечү. Анын денесинин 45 пайызы күйүп, жандандыруу бөлүмүндө жатат. Келиндин жакындары анын 7 айлык кош бойлуу экенин айтышты.