Нарын облусунда авиакырсыктан каза болгон 3 тургундун сөөгү жерге берилди

Бүгүн, 18-январда Нарын облусунун Кочкор айылында авиакырсыктан каза болгон 1980-жылы туулган Гүлжан Исакованын, 2011-жылкы Руслан Шаршенбековдун, Нарын шаарында 1988-жылы туулган Наргиза Кожоналиеванын сөөгү жерге берилди. Бул тууралуу КРнын Өкмөтүнүн Нарын облусундагы ыйгарым укуктуу өкүлүнүн басма сөз кызматы билдирди.

"Нарын районуна караштуу Жерге-Тал айылынан бир туугандар Адинай Белекованын (2010) жана Мадина Белекованын (2003) сөөгү Сокулукка коюлду", - деп айтылат маалыматта.

Каза болгондордун жакындарына жардам көрсөтүү максатында Кыргыз Республикасынын Президентинин атынан 100 миң сомдон, Жогорку Кеңештин төрагасынын атынан 80 миң сомдон, өкмөттүн атынан 70 миң сомдон, Нарын облусунун элинин атынан 30 миң сомдон үй-бүлөлөрүнө берилгени маалым болду.