Элчи Ибрагим Жунусов: "Түнкү клубда адам өлтүргөндөрдү "кыргыз" дегендер кыргыз элинен кечирим сурашы керек"

Түркиядагы Кыргыз Республикасынын элчилиги "Reina" түнкү клубундагы террорчуну "Кыргыз жараны" деген жергиликтүү жалпыга маалымдоо каражаттарынан кыргыз элинен кечирим суроону талап кылат. Бул тууралуу элчи Ибрагим Жунусов "Түркия үнү" радиосуна берген маегинде билдирди.

"Клубдагы адамдарды аткылаган Абдулгадир Машарипов жашаган үй Кыргыз жаранынын үйү делип жазылып кеткен. Чалгындоо кызматы менен биргеликте иш алып барып, кыргыз эмес экенин аныктадык. Анын сүрөтүнөн кыргыз эмес экенин көрсөм да, анда Кыргыз Республикасынын жасалма паспорту бар болушу мүмкүн деп чочуладым. Бирок бүгүнкү күндө Ирактын жараны болуп чыкты. Кыргыз жараны делгенде эле Чалгындоо кызматы эч кандай расмий маалымат бербегенин билдирип, маалыматты жалпыга маалымдоо каражаттары гана таратып жатканын айтышты. Мындай окуя биринчи эмес, экинчи жолу болуп жатат. Мен "бул Кыргыз өлкөсүнүн жараны" деп жазган ар бир басылмага кат жөнөтөм. Эгер алар кыргыз элинен ушул кетирген маалыматы үчүн кечирим сурашпаса, алар менен мыйзам чегинде сүйлөшөм", - деген элчи.

Ошондой эле Ибрагим Жунусов Кыргыз жараны Йахье Машрапов аны да теракт уюштурган адам катары көрсөтүп, паспортун жарыялаганы үчүн айрым ЖМКларды сотко бергенин айтып өттү. Ага элчилик жана консулдук көмөк көрсөтөрүн билдирди.