Кинотеатрда орун талашып мушташкан Эльзат Жедигерованын авиакырсык тууралуу жазган билдирүүлөрү сынга алынууда

2016-жылдын июнь айында интернеттеги социалдык тармактарда Конституциялык палатанын соту Жедигер Саалаевдин кызы Эльзат Жедигерова менен Айзат Дастанова аттуу кыздын орун талашып уруша кетишкен окуясы кызуу талкууга алынган эле. Эми кайрадан Эльзат Жедигерованын 16-январда болгон авиакырсык тууралуу: "Алгач Кыргыз жараны болгон террорчу Түркияда 39 кишини өлтүрдү. Эми бизде 39 киши каза болду. Кандайдыр бир мыйзам ченемдүү окуя. Мен бардык нерсе кайтып келерине ишенем", - деп табалаган маанидеги сөздөрү интернетте кызуу талкууга алынууда.

Ошондой эле анын 17-январь - аза күтүү күнүндө социалдык баракчасы аркылуу орусиялык ырчылардын ич кийимдерин сындаганы, коомдук адепке сыйбаган тамашаларды жазганына карата колдонуучулардын "азыр элдин тамашаны угууга акыбалы жок" дегендерине "силерди ойлогонго чамам жок, менин өзүмдүн дүйнөм бар" деп жооп узаткан.

Ал эми атасы Жедигер Саалаев жергиликтүү басылмалардын бирине кызы кинотеатрда болгон окуядан кийин үй-бүлөсүнө таарынып, өзүнчө жашап жатканын, анын жазгандары тууралуу эч нерсе айта албасын билдирген.