Депутат кесиптештерине Лениндин сөзүн эскертти

Жогорку Кеңештин КСДП фракциясынын 20-январдагы отурумунда Агрардык университеттин гидромелиорация факультетине тапшыруу үчүн жалпы республикалык тестирлөө боюнча босоголук чекти төмөндөтүү маселеси көтөрүлдү.

Депутат Азамат Арапбаевдин айтымында, аталган факультетте студенттер жетишсиз болууда. "Өлкө бул кесип боюнча адистерге муктаж. Абитуриенттерге бул факультетке тапшырууга жеңилдик түзүп беришибиз керек", - деди Арапбаев.

Депутат Евгения Строкова босоголук чекти төмөндөтүүнүн ордуна билим берүү деңгээлин жогорулатыш керектигин айтты. "Владимир Ленин айткан: "Искусствону адамдардын деңгээлине түшүрбөш керек, адамдарды искусствонун деңгээлине көтөрүш керек". Мектептердин салынышы - бул жөн эле инфраструктура. Билимдин сапатын көтөрүү зарыл", - деди Строкова.

Депутат Дастан Бекешев эгер Билим берүү министрлиги бир факультет үчүн босоголук чекти төмөндөтсө, анда башка факультеттер да суранып баштай турганын айтты.