Америкада Дональд Трампка каршы "Аялдар жүрүшү" өтүп, ага дүйнөгө белгилүү жылдыздар катышты (фото)

Америкада президент Дональд Трампка каршы "Аялдар жүрүшү" болуп өттү. Акцияга 100 миңден ашуун адам катышып, алардын катарын дүйнөгө белгилүү атактуулар толукташкан. Уюштуруучулардын айтымында, акциянын максаты - коомчулуктун көңүлүн аялдардын көйгөйлөрүнө буруу. Себеби алардын пикиринде, Трамптын бийликке келиши менен аялдардын укуктары коркунучка туш болууда. Жүрүшкө чыккандардын арасында Мадонна, Шарлиз Терон, Натали Портман, Эмма Уотсон, Скарлетт Йохансон, Кристен Стюарт, Жулианна Мур, Хлоя Морец, Майли Сайрус, Эшли Жадд жана башкалар Америка шаарларынын көчөлөрүндө бир нече курч билдирүүлөрдү айтышкан.

Белгилүү ырчы Мадонна "Абдан ачуум келип турат. Жадакалса Ак үйдү жардырууну да ойлогом" деп, эл алдында сөгүнүп, коомдук адепке сыйбаган сөздөрдү айтууга жетишкен. Андыктан акцияны көрсөтүп жаткан телеканалдар бир нече жолу эфирдин үнүн өчүрүп салууга мажбур болушкан. Ал эми актриса Шарлиз Терон кесиптештеринин жалындуу сөздөрүн угуп, толкунданып ыйлап жиберген.

"Урматтуу президент, өзүңүздүн кызыңыз Иванка Трампты колдогондой, менин да кызымды колдоңуз. Себеби сиздин саясатыңыздын айынан ал алдыга жылган эмес, артка кеткен өлкөдө жашай баштайт", - деген Скарлетт Йохансон.