Авиакырсыктан жабыр тарткандарга турак жайлардын чатырларын оңдоо үчүн 150 даана шифер берилди

16-январда болгон авиакырсыктан жабыр тарткандарга турак жайлардын чатырларын оңдоо үчүн 150 даана шифер берилди. Бул тууралуу Өзгөчө кырдаалдар министрлиги билдирди.

"Бузулган турак жайларды калыбына келтирүү үчүн курулуш материалдары муктаж болгондорго берилет. Бүгүнкү күндө "Семетей" мейманканасында 13 үй-бүлөдөн 40 адам жайгаштырылган. Алардын 25и чоң адамдар, 15и кичинекей балдар. Мындан сырткары жакындарынын жана туугандарынын үйүнө 35 адам жайгаштырылган. Жабыр тарткандарга керектүү жардам көрсөтүлүүдө", - деп айтылат маалыматта.

Ал эми социалдык тармактардагы куткаруучулар кырсык болгон жерде противогазсыз, бет капчан иштешкени тууралуу маалыматты Өзгөчө кырдаалдар министрлиги төгүндөдү.

"ӨКМнын кызматкерлери издөө-куткаруу иштеринде коргоочу жабдыктар менен иштешти. Ошондой эле Жарандык коргонуу кызматы дагы кошумча жабдыктар менен камсыздаган. Кырсык болгон жерде медициналык жардам алуу үчүн кайрылуулар болгон эмес. Бул коопсуздук эрежелери сакталгандыгынан кабар берет", - деп жазылган маалыматта.