Эреже бузган айдоочуну милиция кызматкерлери ок атуу менен токтотушту

27-апрелде Бишкектин Лев Толстой-Т.Фрунзе көчөлөрүнүн кесилишинен жол кыймылын көзөмөлдөө кызматкерлери Ниссан унаасын токтотууга аракет кылган, бирок айдоочу токтобой качып кеткен. Андан соң милиция өкүлдөрү аталган унаанын артынан кууп, жол белгилерине карабастан токтобой кете берген унаага акырында ок атууга туура келген. Алгач абага, андан соң унаанын дөңгөлөгүнө атышкан. Айдоочу буга да караган эмес, ылдамдыгын ан сайын күчөтүп, Д.Сяопин көчөсүнөн гана унаадагы жүргүнчүнү түшүрүү үчүн токтогон. Айдоочу ушинтип колго түшкөнүн Бишкек шаардык ИИББинин басма сөз кызматы билдирди. Тергөө учурунда айдоочу Токтогул районунун 25 жаштагы Т.Ж. аттуу тургуну экендиги аныкталды. Ал мас абалында болгон. Ленин РИИБинин кызматкерлери иштин чоо-жайын иликтөөдө.