Эдил Байсалов: "Президентти сындоодо мага эч ким жетпейт"

"Кыргыз жеринде социалдык түйүндөр кысымга алынууда" деп коркуп, элди да коркутуп ызы-чуу кылуунун кереги жок. Бул тууралуу бүгүн, 24-январда Бишкекте өткөн тегерек столдо оппозиция өкүлү Эдил Байсалов билдирди.

Байсалов азыркы учурда сөз эркиндиги жакшы эле экенин айтып: "Биз пост жазууга жоопкерчиликтүү мамиле кылышыбыз зарыл", - деди. Иш-чарага катышкан экс-депутат Бегалы Наргозуев Байсаловго "Бир кезде президентти сындап, "мени өлтүрүүгө буйрук берилди" деп айтып чыктыңыз эле. Бул чын беле же жөн эле айтып койдуңуз беле?" деген суроо узатты эле, Байсалов "Бул таптакыр башка маселе. Ал эми президентти сындоо жагынан мага эч кимиңер жетпейсиңер" деп жооп кайтарды. Байсалов бүгүнкүдөй аракеттен жыйынтык чыкпайт деген пикирде.

Белгилей кетсек, Бишкекте бүгүн "Социалдык түйүндөргө басым: Кантип коргонуу керек?" деген темада тегерек стол өтүүдө.