Бишкектеги курулуш компаниясы уруксат кагаздары жок көп кабаттуу турак жайдын курулушун баштаган

Бишкек шаарында “Аалам Строй” жоопкерчилиги чектелген коому мыйзамды одоно бузуу менен курулуш ишин баштаган. Бул тууралуу Мамлекеттик экологиялык-техникалык инспекция кабарлайт.

Маалыматка ылайык, аталган ишкана эч кандай уруксат кагаздары жок Исанов менен Рыскулов көчөлөрүнүн кесилишинде көп кабаттуу турак жайдын котлованын казып, оор унаалар менен кум-шагыл ташып иш жүргүзө баштаган.

"Иликтөө иштеринин негизинде аталган ишканада иштеп жаткандар “Аалам Строй” ЖЧКсынын ээси инспекторлорго жолугуудан баш тартканын билдиришти. Мыйзамсыз жүргүзүлүп жаткан
иш-аракеттеринин негизинде экологияга одоно зыян келтирилип жаткандыгы тууралуу коңгуроо кагылды. Себеби айлана-чөйрөгө кум-шагылдар иретсиз төгүлүп, жер кыртышы бузулган. Ал эми жүк ташыган оор унаалардын дөңгөлөктөрү баткак болуп, шаар көчөлөрүн булгап жатат", - деп айтылат маалыматта.

Учурда аталган ишкананын мыйзамсыз курулуш иштери токтогону кошумчаланат маалыматта.