Сузак районунда түн ичинде сим-карта сатып жүргөн өспүрүмдөр кармалышты

Ош-Бишкек унаа жолунун боюндагы тамактануучу жайларда түн ичинде сим-карта сатып жүргөн жашы жете элек өспүрүмдөр кармалышты. Бул тууралуу бүгүн, 25-январда Жалал-Абад облустук ички иштер башкармалыгынан билдиришти.

Маалыматка караганда, кармалган балдар Жалал-Абад шаарындагы №2, №7 жана №34-орто мектептин окуучулары болушкан. Алардын эң кичүүсү 7-класстын окуучусу болуп чыкты. Аларга тиешелүү протокол түзүлүп, балдардын ата-энелерине эскертилип, түшүндүрүү иштери жүргүзүлдү. Кармалган балдар түнкү саат 22-23кө чейин иштеген күндөрү болгонун айтышкан.

Ошондой эле жашы жете элек өспүрүмдөрдү иштетип жаткан уюлдук компаниянын эки кызматкеринен да түшүнүк кат алынды. Компаниянын өкүлдөрүнүн айтымында, жаш балдарды ата-энелеринин уруксаты менен жумушка алышкан.

Мыйзамга ылайык, жашы жете элек балдарды ата-энесинин уруксаты менен гана иштетүүгө болот. Бирок оор жумуштарга жана түн ичинде иштөөгө уруксат берилбейт.