Бишкекте дарыгерлер авиакырсыктан стресске кабылган тургунду 8 саат бою күттүрүп кабыл алышты

Бишкек шаарындагы психоневрологиялык оорукана Курулуш башкармалыгынын дачалары айылынын жашоочусун 8 саат бою күттүрүп кабыл алганын бүгүн, 25-январда тургундун жубайы Гүлбарчын Жумабекова SUPER.KG порталына билдирди.

"Таңга маал учак кырсыгы орун алганда учактын сыныктары биздин үйдөн бир аз гана аралыкта кулап түштү. Катуу жарылуу болуп, жер титиреп кеткенде кызым коркуп оозунун ичине учук чыгып, анысы тамагына чейин жетип ооруканага жатты. Кырсыкта биринчилерден болуп жолдошум каза тапкандарды алып чыгууга катышкан. Буга чейин ал мындай окуяга күбө болгон эмес да, мындан улам бир канча адамды алып чыккандан кийин катуу стресске кабылып, колдору титиреп калган", - деди Жумабекова.

Гүлбарчын Жумабекованын маалыматына ылайык, борбор калаадагы психоневрологиялык оорукана 23-январь күнү эртең мененки саат 09:00дө барган бейтап Мирлан Токоевди кечки 17:00дө кабыл алган.

"Жолдошумду жардамга келген психолог кыздар оорукананын жетекчилиги менен сүйлөшүп жатып жаткырышты. Анда да "силер, мүмкүн, мародёрсуңар" деп ишенишпей, оорукананын чыгымдарын алгач төлөтүп, анан жаткырышты. Ага чейин дарыгер түштөнүүгө кетип баратканын айтып, бейтапты күттүрүп койду. Оорукананын чыгымдарын Биринчи балдар хосписи төлөдү", - деп кошумчалады Жумабекова.