Түркиянын вице-премьерине жергиликтүү ЖМКлар кыргыз-түрк мамилесине доо келтирип жатышканы айтылды

Кечээ, 24-январда Кыргыз Республикасынын Түркиядагы ыйгарым укуктуу элчиси Ибрагим Жунусов Түркиянын вице-премьери Тургул Түркеш менен жолукту. Бул тууралуу элчиликтин басма сөз кызматы бүгүн, 25-январда билдирди.

Жолугушуунун жүрүшүндө тараптар саясий, соода-экономикалык жана маданий-гуманитардык жаатта гана эмес, коопсуздук тармагындагы кыргыз-түрк мамилелери тууралуу сүйлөшүүлөрдү жүргүзүшкөнү маалым болду. Элчи акыркы убактарда түркиялык жалпыга маалымдоо каражаттарында Кыргыз жарандарынын теракттарга катыштыгы бар тууралуу далилсиз жана тастыкталбаган маалыматтар чыгып жатканын айтты. Ибрагим Жунусов бул абал эки өлкөнүн достук мамилелерине доо келтирип жатканын, тиешелүү басылмаларга тастыкталбаган маалыматты төгүндөө талабы менен кат жөнөтүлгөнүн кошумчалаган.

Мындан сырткары жолугушууда эки тараптуу кызматташуунун башка багыттарын да сүйлөшүшкөнү маалым болду.