Бишкектеги Түркиянын элчилигинин алдында активисттер Боинг 747 учагындагы жүктүн ээсин атоону талап кылышууда

Түркиянын Бишкектеги элчилигинин алдына бүгүн, 26-январда активисттер Өндүрүш Токтонасыров жана Жеңишбек Жумалиев нааразычылык акциясына чыгышты. Алар кыйраган учактагы жүктүн ээсин атоону талап кылып, "Жүктүн ээсин ачык айтсын!" деген жазуусу бар плакаттарды көтөрүп алышкан.

"Кырсык бүтүндөй кыргыздарды капа кылды. Эмне үчүн кайсы бир табакташ тараптар Кыргыз жергесине мыйзамсыз жүк ташуу жолу менен элди кайгыга салышы керек? Түркиялык компания кара жолтой жүктүн ээсин ачык айтсын. Эки тарап эки бөлөк маалымат берип жатышат", - дейт активист.

Нааразычылыкка чыккан активисттер элчиликтин жетекчилиги чыгып талаптарын укпаса кечке чейин турарын айтышты.

"Биз Түркиянын өлкө башчысы Режеп Тайип Эрдоганга кайрылабыз. Ал кыргыз элине жүктүн кимге таандык экенин айтып берсин. Эгерде элчиликтен эч ким чыкпаса, биз аларды дипломатиялык элчилик эмес, бандиттер деп билебиз. Алар бизге оң жооп беришпесе, анда нааразычылык акциясын уланта беребиз", - деп кошумчалады Токтонасыров.

Азырынча активисттердин нааразычылыгына элчиликтен эч ким чыгып жооп бере элек.