Бишкекте үйлөрдү бир күнгө ижарага берүүгө тыюу салган мыйзамга каршы тургундар митингге чыгышты

Бүгүн, 26-январда Максим Горький атындагы сейил бакта батирлерди бир нече саатка же суткага мейманкана иретинде ижарага берүүгө тыюу салган мыйзамга каршы жарандар тынч митингге чыгышты. Анда 50дөй мейманкана иштеткен тургундар мыйзам туура эмес кабыл алынганын, өзгөртүү киргизүү зарылдыгын жана алар жумушсуз калганын айтып чыгышты.

Митингдин катышуучуларынын бири Жанна Найзабекова буларды билдирди:

"Биз колубуздан келген жумушту жасап, жашап жатабыз. Үйлөрдү бир суткага берүү менен биз сойкуларга же дагы башка кооптуу адамдарга баш паанек берип жаткан жокпуз. Болгону алыс аймактардан келген жарандарга баш паанек берип жатабыз".

Эскерте кетсек, батирлерди сааттык жана суткалык мейманкана катары берүүгө тыюу салган мыйзамга каршы Каракол шаарынын тургундары да чыгышкан.

Мыйзамды бузган жарандарга 7 миң, кызмат адамдарына 9 миң, юридикалык жактарга 70 миң сомго чейинки өлчөмдө айып салынат. Ошондой эле мыйзамда ички иштер органдары көрсөтүлгөн администрациялык укук бузуулар боюнча иштерди карап, администрациялык айыптарды төлөтүүсү каралган.