Депутат нааразы. "Миллиондогон карыз алынып жатат - пайда жок"

Жогорку Кеңештин КСДП фракциясынын 27-январдагы жыйынында өкмөт мүчөлөрү Кыргыз өлкөсү 25 жыл ичинде алган насыялар жана гранттар боюнча маалымат беришүүдө.

Отурумдун жүрүшүндө депутат Автандил Кулбараков карызга алынган акча каражаттары натыйжасыз пайдаланылып жатканына нааразычылыгын билдирди. "Өкмөт берген маалыматта 3 миллион евро жаштарга деп бөлүнүптүр. Эмне иштер аткарылды?" - деп сурады Кулбараков. Каржы министри Адылбек Касымалиев бул суроого жооп бере албады.

Андан соң Кулбараков төмөнкүдөй суроо менен кайрылды: "2 миллион евро кургак учук оорусун дарылай турган оорукана куруу үчүн бөлүнүптүр. Бул оорукана курулдубу?" Саламаттык сактоо министри Талантбек Батыралиев аталган оорукананын курулушу баштала электигин айтты.

"5 миллион доллар "Ала-Арча" улуттук сейил багында кичи ГЭСти курууга бөлүнгөн деп жазылып турат. Бул кичи ГЭС салындыбы?" - деп сурады депутат. Улуттук энергохолдингдин өкүлү бул карыз боюнча маалыматы жок экенин айтты.

Депутат Кулбараков өкмөт мүчөлөрүнүн жоопторуна нааразы болду. "Миллиондогон карыз алынып жатат - пайда жок. Жумгалда балдар 13 чакырым алыстагы мектепке барып окушат. Учурда карышкырлар көбөйгөн. Балдарга коркунучтуу. Жумгалда бир мектепти курууга 20 миң доллар жетишет. Ушул жерге мектеп салып берсеңер болмок. Карызга алынган акчага туура мамиле кылыш керек", - деди өкмөткө депутат.