ЖЫЛНААМА, 31-ЯНВАРЬ: 47 жыл мурун советтик окумуштуу, Ми үлгүсүндөгү тик учактардын конструктору Михаил Миль каза болгон

Мындан 47 жыл мурун, 1970-жылы 31-январда советтик окумуштуу, тик учактардын конструктору Михаил Миль 61 жашында көз жумган. Ал 1909-жылы 22-ноябрда Иркутск шаарында төрөлгөн. 12 жашында учактын үлгүсүн жасап, Томск шаарында өткөн сынакка катышып, жеңип алган. 1925-жылы Сибирь технологиялык институтуна тапшырган. Көп өтпөй Новосибирск шаарына көчүп барып иштеп, Дон политехникалык институтуна тапшырган. Окуусун бүтүргөн соң, 1931-жылы Борбордук аэрогидродинамикалык институтта иштеп калат. Ал эми Улуу Ата Мекендик согуш учурунда, 1941-жылдан 1943-жылга чейин Билимбай аймагында согуш учактарын оңдоп-түзөп иштеген. 1951-жылы анын башчылыгы алдында 3 орундуу Ми-1 үлгүсүндөгү тик учак жасалган. Кийинки жылдары Милдин командасы Ми-2, -4, -6, -8, -10, -10К, В-12, -24 үлгүлөрүндөгү тик учактарды жасап чыгарган. 1964-жылдан тарта тик учактарды куруу боюнча башкы конструктор болуп эмгектенген. Анын ысымы Москвадагы тик учак ишканасына жана Орусиянын бир нече шаарларындагы көчөлөргө ыйгарылган.