Стамбулдун прокуратурасы "Ататүрк-Ала-Тоо" университетин террордук идеяларды жайылтуучу уюмдардын тизмесине кошту

Стамбулдун прокуратурасы Эл аралык "Ататүрк-Ала-Тоо" университетин террордук идеяларды таратуучу уюмдардын катарына кошту. Бул тууралуу кечээ, 30-январда түркиялык "Hürriyet" басылмасы жазып чыкты.

"Түркиянын прокуратурасы Кыргыз мамлекети, Казакстан, Түркмөнстан, Азербайжан, Румыния жана башка өлкөлөрдө жайгашкан, "Фетхуллах Гүлендин террордук уюмуна тиешеси бар" делген билим берүү мекемелеринин тизмесин жарыялады. Бул окуу жайлар Гүлендин кыймылын жайылтып жаткандыгы белгиленген", - деп жазган басылма.

Эскерте кетсек, 2016-жылдын 16-июлунда Түркияда аскердик төңкөрүш жасалып, аны уюштурууга АКШда жашаган Фетхуллах Гүлен айыпталган.

Мындан тышкары прокуратура Түркияда Ф.Гүлендин 17 университети бар болгонун, 16-июлдагы окуядан соң алардын жабылганын белгилеген. Жетиштүү далилдердин бар экендиги айтылып, террордук уюмга мүчө деп шектелгендерди 7,5 жылдан 15 жылга чейин эркинен ажыратуу талабы коюлган. Гүлендин уюму 2002-2013-жылдары 8500 окутуучуну университеттерге жумушка киргизгени айтылат маалыматта.

Белгилей кетсек, Бишкектеги Эл аралык "Ататүрк-Ала-Тоо" университети 1996-жылы ачылган.