Ошто улуттук оюндар боюнча спорт мектебин ачуу пландалууда

Ош шаарына спорттук мектеп ачуу пландалууда. Бул тууралуу бүгүн, 2-февралда Ош шаардык мэриясынын басма сөз кызматынан билдиришти.

"Ош шаарынын спортчулары 2016-жылы түрдүү мелдештерге катышып, ийгилик жаратышты. Спортчулар 32 эл аралык турнирге, 23 республикалык деңгээлдеги мелдештерге, 24 ирет Кыргыз Республикасынын биринчилигине, 4 жолу Азия биринчилигине катышкан. Ошондой эле 1 жолу Азия биринчилигинде жана 3 Дүйнө биринчилигинде күч сынашкан. Мындан улам 2017-жылы Ош шаарында спорттун улуттук түрлөрүн өнүктүрүү максатында ордо, тогуз коргоол, кур күрөш оюндарына өзгөчө көңүл бурулуп, спорттук комитетке караштуу улуттук оюндар боюнча спорт мектебин ачуу пландалып жатат", - деп билдирди басма сөз кызматы.

Маалыматка ылайык, Ош шаарынан чыккан спортчулар мелдештердин жыйынтыгында 96 алтын, 88 күмүш, 116 коло медалдарга ээ болушкан.