Графикалык дизайнер Никита Тарасенко: "Жаңы 200 сомдукка Алыкул Осмоновдун элеси көзү кылый, бети көгөргөн болуп түшүрүлгөн"

Дизайнер Никита Тарасенко социалдык тармактагы баракчасына Улуттук банктын 2010-жылы жана 2016-жылы чыгарган 200 сомдук банкнотторунун графикалык сүрөтүн далил катары жайгаштырып, ага акын Алыкул Осмоновдун элеси көзү кылый болуп түшүрүлгөнүн жазган.

Ал SUPER.KG порталына: "Улуттук банк акындын элесин купюрага түшүрүүдө олуттуу мамиле жасашы керек эле. Алар жаңы 200 сомдукка А.Осмоновдун көзү кылый, анысы аз келгенсип бети көгөргөн болуп түшүрүлүп калганын моюндарына алышкан жок", - деп билдирди.

Эскерте кетсек, 2016-жылдын декабрь айында акындын 200 сомго түшүрүлгөн сүрөтүндө анын көзү кылый болуп калгандыгы айтылып, муну коомчулук катуу сынга алган.

Ал эми Улуттук банк кызуу талкууга алынган бул маселе тууралуу: "2016-жылы чыгарылган өркүндөтүлгөн 200 сом номиналындагы Алыкул Осмоновдун портретинде 2010-жылы чыгарылган IV сериядагы 200 сомдук банкноттогу элеси эле чагылдырылган. Өркүндөтүлгөн 2016-жылкы банкнотто бир гана бул портретти аткаруунун техникалык ыкмасы өзгөртүлгөн. Тескерисинче, жаңы банкноттордогу сүрөттөр даана көрүнүп, бир кыйла көркөмдөлдү", - деп билдирген эле.

Жаңы 200 сомдуктар 2017-жылдын 1-январынан тарта жүгүртүүгө чыккан.