Москвада Варшава шоссесинде жол кырсыгына кабылган Кыргыз жаранынын абалы оор, туугандары табыла элек

1-февралда Москвадагы Варшава шоссесиндеги жол кырсыгынан 1994-жылкы Кыргыз жараны жабыркап, Н.И.Пирогов атындагы №1-Шаардык ооруканага жеткирилген. Элчиликтин кызматкерине реаниматолог катуу жабыркаган К.Б. аттуу жарандын абалы оор, бирок туруктуу экенин билдирген.

"К.Б. аттуу баланын абалы оор болгондуктан, дарыгерлер ага эч кимди киргизбей жатышат. Туугандары табыла элек", - деп билдирди КРнын Орусиядагы элчилиги.

Троицк жана Новомосковск административдик аймактарынын Тергөө башкармалыгы тарабынан Орусия Федерациясынын Кылмыш-жаза кодексинин №264-беренеси (2 же андан көп адамдын өлүмүнө алып келген жол жана транспорттук каражаттарын эксплуатациялоо боюнча эрежелерин бузуу) боюнча кылмыш иши козголгону белгилүү болду.

Маселе элчиликтин көзөмөлүндө.