СУПЕРСТАН: "Интернеттеги балдарды суицидге түрткөн оюндан сак болууга чакырабыз деп, тескерисинче, пропагандалап жатабыз"

SUPER.KG порталынын "Суперстан" бөлүмүндө "Интернеттеги балдарды суицидге түрткөн оюн тууралуу оюңар" деген тема талкууга алынууда.

Темадагы билдирүүлөрдөн:

"Мага кызык болуп жатат, мен айылда турам, бул жакты таап келе албастыр деп ойлоп коём, бирок коркунучтуу".

"Мунун баары жалган эле го, кантип эле бир оюндун айынан адам өз жанын кыйсын? Менин оюмча, бул саясатчылар үчүн керек болуп жаткандай".

"Жашоодон түңүлгөндөр ойносо керек. Менин тааныш эки иним бар, ошолор бүгүн сүйүнчүлөйт, "биз 50 күндөн кийин өлөбүз" деп. "Неге?" десем "Көк китке" кошулдук" дешет. Сөктүм эле".

"Мына, жалпыга сак болгула деп бардык жактан какшаганыбыз менен, тескерисинче, кайра муну пропаганда кылып жатабыз".

"Ушу форумдагы эле ойноп көрөйүн дегендерге каршымын. Форумга каттала албай жүргөн жаш балдар, кыздар бар, алар дагы ойноп көрөйүн деп азгырылып кетишпесин".

"Өткөөл курактагы өспүрүмдөрдүн психологиясын баштыкка окшоттум, эмне салсаң да ылгабай сала берген. Ал баштыкта чирип жок болуп кетеби же жөн гана ошол бойдон калабы, ал баштыкка салынган нерседен көз каранды.
Ата-эне, айлана-чөйрөдөгү адамдар да кандайдыр бир деңгээлде жардам берип, ак-караны ажыратып, балага жакшы сөз менен түшүндүрүп, оң жана терс жактарын мисалдар менен айтып, баланы оң жолго салуу керек".

"Ушул оюнду кайра-кайра айтып, ар бирибиз жарыялоо менен билбегендерге билдирип, кызыкпаганды кызыктырып, дүрбөтүп жатабыз.
Билбегендер "ал кандай оюн экен, бир жолу ойноп көрүш керек экен" деп кызыгуулары артып жатканын мектепте өткөн чогулуштан байкадым. Элди дүрбөлөңгө салбай, тиешелүү тармактар өз иштерин аткарып, ата-энелер балдарын көзөмөлгө алышса..."

Талкууга кошулгуңуз келсе, бул жакка кириңиз.