Интернет айдыңында өспүрүмдөрдүн өмүрүнө коркунуч жараткан оюндар боюнча өкмөттө жыйын өттү

Сооронбай Жээнбеков интернетте балдардын жана өспүрүмдөрдүн өмүрүнө коркунуч жараткан виртуалдык оюндар боюнча жыйын өткөрдү. Маалыматты 3-февралда өкмөттүн басма сөз кызматы билдирди.

Премьер-министр алдын алуу чараларын күчөтүп, ата-энелерге да, балдарга да түшүндүрүү иштерин жүргүзүү керектигин айтты. Бул үчүн мамлекеттик органдар, жарандык коомчулуктун өкүлдөрүн тартуу зарылдыгын белгиледи. Мындан сырткары өлкө аймагында суроолорго жооп ала турган линия ачууну буюрду.

Билим берүү министри Гүлмира Кудайбердиева мектеп жетекчилиги окуудан сырткары балдар жана ата-энелер менен сүйлөшүү боюнча иш-аракеттерди көрүп жатканынан кабар берди. Министр жаш активисттерден, студенттерден турган топ ачылганын кошумчалады.

Ал эми Бишкек шаарынын вице-мэри Айгүл Рыскулова түнкүсүн интернет-клубдарды жабуу сунушун айтты. Жолугушуунун жыйынтыгында Мамлекеттик маалымат технологиялар комитетине оюнга аралашкан балдардын аккаунттарын жабуу боюнча инструкция иштеп чыгуу тапшырмасы берилди.