Дональд Трамптын качкындар тууралуу буйругунун аткарылышы токтотулду

Вашингтон штатынын башкы прокурору Боб Фергюсон миграция саясаты үчүн президент Дональд Трампты, Ички коопсуздук министрлигин жана президенттин администрациясын Федералдык сотко берерин мекеменин расмий сайтына жарыялаган.

Ал ислам динин карманган 7 өлкөнүн тургундарына АКШга кирүүгө тыюу салган Трамптын буйругу Конституцияга туура келбесин таанууну талап кылууда. Анын ою боюнча, буйрук мыйзам алдындагы тең укуктуулук, динге ишенүү эркиндиги, адилеттүү соттук иликтөө жана иммиграция жөнүндө Америка Конституциясынын жоболоруна каршы келет.

Ошондой эле Фергюсон буйруктун аткарылышын токтотуу өтүнүчүн жиберген. Доо арызда Трамптын иш-аракети Вашингтондо үй-бүлөлөрдү бөлүп, миңдеген жашоочуларына зыян алып келгени, экономикага терс таасирин тийгизип жатканы жазылган.

Башкы прокурордун арызынан кийин Федералдык сот 4-февралда президенттин буйругунун аткарылышын токтоткон. Бул тууралуу жергиликтүү басылмалар жазышууда. Сот Вашингтон штатынын прокуратурасынын доо арызы каралмайынча буйрук күчүн жоготорун билдирген.

Мындан кийин америкалык визалык органдар жаңы буйруктан жокко чыгарылган визаларды калыбына келтире башташкан. Буйрук чыкканда 100 миңдей виза жокко чыгарылган.