Мусулмандар АКШнын аймагына киргизиле баштады

Мусулман өлкөлөрүнүн жарандары соттун чечими менен Дональд Трамптын миграция тармагындагы буйругу токтотулган соң Америка Кошмо Штаттарына тоскоолдуксуз кире башташты. Бул тууралуу жергиликтүү маалымат булактары жазышууда.

Йемен, Сирия жана Ирак өлкөлөрүнөн АКШга бараткан 33 мигрант Каирдин аэропортунда учакка тоскоолдуксуз түшүшкөнү маалымдалат. Ошондой эле сириялык үй-бүлөлөргө да АКШга кирүү мүмкүн болуп жатканы белгилүү болуп, Катардагы авиакомпаниялар АКШга кетчү каттамдарга мусулман жүргүнчүлөрдү кабыл алып жатышканы маалым болду.

Мигранттардын иштери менен алектенген адвокаттар Нью-Йорк, Вашингтон, Бостон жана дагы башка шаарлардын аэропортторуна АКШга кирүүгө тыюу салынган өлкөлөрдүн жарандары келип жатышканын маалымдашкан.

Эскерте кетсек, буга чейин Трамп Иран, Ирак, Йемен, Ливия, Сирия, Сомали жана Судан өлкөлөрүнүн жарандарына АКШга 90 күнгө кирүүгө тыюу салган.