"Супер сулуу-2016" сынагынын жеңүүчүсү Бактыгүл Орозбаева жана "тамашоучу" Калыбек Турдубаев Бали аралына жетип, эс алышууда

"Супер сулуу-2016" сынагынын жеңүүчүсү Бактыгүл Орозбаева жана "тамашоучу" Калыбек Турдубаев Бали аралында алгачкы эс алуу күндөрүн өткөрүшүүдө. Саякатчылардын айтымында, аралда учурда жамгырлуу мезгил болгону менен, аба ырайы ысык.

Белгилүү болгондой, Бали аралынын бир жээгин Тынч океаны, экинчи жээгин Инд океаны курчап турат.

"Биринчи кезекте жомоктогудай эс алуу тартуулаган "Супер-Инфо" гезитине ыраазычылык билдирем. Алгачкы жолу эс алууга чыгып, океанга түшүү бактысына ээ болдум. Мага баары жакты. Болгону абасы аябай нымдуу экен, мончодо жүргөндөй болуп турам", - деди Бактыгүл Орозбаева.

"Бул жакка келиш үчүн 2 күн жол жүрдүк. Эли меймандос келет экен. Алар деле кыйратып англис тилин билбейт, мен дагы. Бирок жаңсашып бири-бирибизди түшүнүп жатабыз. Бейиштей деп бекеринен айтышпайт тура. Өтө керемет жерде эс алууга жолдомо берген "Супер-Инфого", SUPER.KG'ге ыраазычылык билдирем", - деди өз кезегинде "тамашоучу" Турдубаев.

Эскерте кетсек, SUPER.KG порталы 2016-жылдын 10-сентябрында "Тамашоу" командаларынын арасында Кубок уюштуруп, жыйынтыгында "Универсал" командасынын оюнчусу Калыбек Турдубаевге "Мыкты оюнчу" наамы ыйгарылып, Бали аралына жолдомо берилген. Ал эми 9-декабрда SUPER.KG порталынын 10 жылдык мааракеси өткөрүлүп, бүтүндөй коомчулукка салтанаттуу концерттик программа тартууланган. Аталган концертте "Супер сулуу-2016" наамы менен катар Бали аралына жолдомо Бактыгүл Орозбаевага ыйгарылган. Алар 4-февралда Балини көздөй бет алышкан.