"ЭЛДИК КАБАРга" жооп: Баткен райондук билим берүү бөлүмү: "Зардалы айылындагы мектепте окуунун жүрүшү токтогон жок"

Баткен облусунун Зардалы айылындагы мектепте окуунун жүрүшү токтогон жок. Бул тууралуу бүгүн, 7-февралда SUPER.KG порталына Баткен райондук билим берүү бөлүмүнүн башчысы Абдылазис Заитов билдирди.

"Бүгүнкү күндө Зардалы айылындагы мектепте 1-класстан 4-класска чейин 14 окуучу аралашып окуйт. Буга чейин 21 окуучу билим алчу. Кыш айларында райондун борборунан айылга барчу каттам жабылып калат. Ошондуктан мектептен кабар алуу максатында 2016-жылдын күз айларында барып, жылуулук маселесин көзөмөлдөп келгем. "Мектепте окуу токтоп калды" деген туура эмес маалымат. Биз сабактардын жүрүшүн көзөмөлдөп турабыз", - деди Заитов.

Маалыматка ылайык, Баткен районунда 53 мектеп бар. Анын ичинен 10у башталгыч мектеп болуп эсептелет.

Эске салсак, буга чейин окурман "Элдик кабарга" Зардалыдагы мектепте 34 окуучу бар делгени менен, иш жүзүндө бир да бала окубай, мектеп жабык турганын айткан.