Курулуш башкармалыгынын дачалары айылынын тургундары авиакырсыктан жабыркагандардын үй маселесин чечүүнү талап кылып чогулушту

Курулуш башкармалыгынын дачалары айылынын 60тай жашоочусу бүгүн, 8-февралда бийлик өкүлдөрүнөн авиакырсыктан жабыркагандарга үй маселесин чечип берүүнү суранып, башка жерге көчүрүүнү талап кылып чогулушту.

"Элди ойлогон киши калбай калды. Бизди башка жакка көчүрсө жакшы болот эле. Эл коркуу менен жашап жатат. Буга чейин бийлик өкүлдөрүнө көптөгөн суроолорду бердик. Жооп жок болууда. Жабыркагандарга компенсация төлөп берүүнү эртелетүүнү талап кылабыз", - дейт жергиликтүү жашоочу Айнура Абакирова.

"Жашоочуларды көчүрүү боюнча бийлик өкүлдөрү элге маалымат бере элек. Курулуш башкармалыгынын дачалары айылынын өзүндө көчүрүүгө муктаж болгон 400гө жакын кожолук бар. Айылга бейтааныш унаа келсе эле жакшы жаңылык күтүп, чогулуп барабыз", - деди жергиликтүү тургун Малика Усенова.

Маалыматка ылайык, учурда айылдын активисттери жабыркаган үйлөрдү жана алардын канчалык деңгээлде жардамга муктаж экенин тактап жатышат. Ошондой эле жергиликтүү жашоочулар митинг өткөрүп, жол тосуудан алыс экенин билдиришти.