Садык Шер-Нияз: “Каржы министрлиги "Курманжан датка" тасмасын тартып бүтүрүүгө каражат бөлүп бере элек”

“Каржы министрлиги "Курманжан датка" тасмасын тартып бүтүрүүгө каражат бөлүп бере элек”. Бул тууралуу бүгүн, 30-апрелде ЖКнын Билим берүү, илим, маданият жана спорт боюнча комитетинин жыйынында тасманын режиссёру Садык Шер-Нияз билдирди. Айтымында, тармактык комитет акча бөлүп берүү тууралуу чечимди айдын башында кабыл алган. “30-апрелге чейин тиешелүү акча каражаты которулбай келет. Бул Каржы министрлигинин парламентке жасаган мамилесин билдирет”,- деди ал. Эске сала кетсек, 8-апрелде ЖКнын Бюджет жана каржы боюнча комитетинде “Курманжан датка” толук метраждуу көркөм тасмасын аягына чыгаруу үчүн бюджеттен кошумча 30 миллион сом бөлүп берүү тууралуу чечим кабыл алынган.