Орусиядагы адам өмүрүн алган жол кырсыгы боюнча Кыргыз жаранына кылмыш иши козголду

Орусиянын Москва шаарындагы адам өмүрүн алган жол кырсыгы боюнча Кыргыз жаранына кылмыш иши козголду. Бул тууралуу бүгүн, 9-февралда Кыргыз Республикасынын Орусиядагы элчилигинен билдиришти.

Маалыматка караганда, жол кырсыгы үстүбүздөгү жылдын 1-февраль күнү болгон. Анда Варшава шоссесинен Коротыгыно айылына көздөй бурулушта УАЗ менен Тойота үлгүсүндөгү автоунаалар сүзүшкөн. УАЗ өрттөнүп, ичиндеги адамдар унаадан чыга албай калышкан. Жол кырсыгынан 9 адам каза болду, 3 адам жаракат алган. Жабыркагандардын бири Тойота үлгүсүндөгү автоунаанын айдоочусу, Кыргыз Республикасынын жараны 1994-жылы туулган Бекбол Кылычбек уулу болгон. Алгач ал жандандыруу бөлүмүнө жеткирилип, учурда жалпы палатага которулду. Анын үстүнөн "жол эрежесин бузуу менен эки же андан көп адамдын өлүмүнө алып келүү" беренеси боюнча кылмыш иши козголуп, тергөө амалдары жүрүүдө.