Ноокатта жана Кадамжайда мыйзамсыз курал алып жүргөн эки адам кармалды

Тартип сакчылары тарабынан мыйзамсыз курал алып жүргөн эки адам кармалды. Бул тууралуу бүгүн, 9-февралда Ички иштер министрлигинин басма сөз кызматынан билдиришти.

Маалыматка ылайык, Ноокат районунун Кара-Ой айылынын тургуну айылдын четиндеги жайыттан кармалган. Анын жанынан уруксат кагаздары жок курал табылган.

"Атайын иликтөө иштеринин жүрүшүндө Кадамжай районунун З.Б. аттуу 36 жаштагы тургуну кармалган. Кармалган тургун өздүк кароого алынып, ТОЗ-8 үлгүсүндөгү курал эки огу менен табылган. Учурда табылган куралдар экспертизага жиберилген. Аталган фактынын негизинде кылмыш ишинин козголушу каралууда", - деп билдирди басма сөз кызматы.

Ички иштер министрлиги мыйзамсыз курал сатуу, даярдоо, ташуу иштерин аткарса, ошондой эле куралды сактоо, оңдоо, алып жүрүү, ок-дарылардын негизги бөлүмүн жана жарылуучу заттарды колдонгондор кылмыш жоопкерчилигине тартыларын эскертет.