Нарын дарыясынын үстүнө көпүрө салуу пландалууда (эскиз)

Балыкчы-Жалал-Абад альтернативдик жолунун курулушунун 2-фазасында Нарын дарыясынын үстүнөн өтө турчу эстакадалык көпүрө курулат. Бул тууралуу бүгүн, 9-февралда Транспорт жана жолдор министрлигинин басма сөз кызматы билдирди.

Түндүк-Түштүк альтернативдик жолдун курулушунун 1-фазасы (Кызыл-Жылдыз-Арал
183-195-чакырымдары, Казарман-Жалал-Абад 291-433-чакырымдары, Көк-Арт ашуусундагы узундугу 3,7 чакырым болгон тоннель) боюнча жолго калыңдыгы 15 сантиметр асфальт төшөлүп, 454 даана түтүк коюлуп, 9 көпүрө курулуп, 3 көпүрөгө оңдоо иштери жүргүзүлмөк. Кызыл-Жылдыз-Арал жолунун 99 пайыздык жумушу, ал эми Казарман-Жалал-Абад жолунун 47 пайызы аткарылган.

Маалыматка ылайык, Көк-Арт ашуусундагы тоннелдин курулушу улантылууда. Түндүк тарабында 312 метр өткөөлү, жантайма жолунун 484 метри курулуп, анын ичин электр энергия менен камсыздоочу электр чубалгылар орнотулган. Түштүк тарабынын 255 метри, жантайма жолдорунун 265 метри бүткөрүлгөн. Ал эми ал жактын жарыктандыруусу боюнча иштер аяктап калган.

"Жалпысынан долбоор боюнча аткарылчу жумуштун 47 пайызы бүтүп калды. Иштер график боюнча аткарылып жатат. Толугу менен бүткөрүү 2018-жылдын ноябрь айына пландалууда", - деп айтылат министрликтин маалыматында.

2-фазасында Арал-Казарман жолу салынат. Калыңдыгы 15 сантиметр асфальт төшөлүп, 234 метрге түтүктөр орнотулуп, 2 жаңы көпүрө салынып, 3 көпүрө оңдолмокчу. Учурда жолдун курулушуна даярдыктар жүрүүдө.

"Долбоор боюнча узундугу 1891 чакырым 4 тоннель курулмак. Тоннелдерди эстакадалык көпүрөлөргө алмаштыруу тууралуу сүйлөшүлүп жатат. Алардын узундуктары 1891 метр жана 396 метр болмокчу", - деп кошумчалаган министрлик.

Учурда бул аймакта жумуштун 22 пайызы аткарылган. 3-фазасында Арал-Суусамыр жолунун оңдоп-түзөө иштери аткарылмакчы.