Мухаммедкалый Абылгазиев: "Айыл чарба тармагында эски отчёттор менен эмес, жаңы пландар менен иш алып баруу зарыл"

"Айыл чарба тармагында эски отчёттор менен эмес, жаңы пландар менен иш алып баруу зарыл". Бул тууралуу биринчи вице-премьер-министр Мухаммедкалый Абылгазиев КРнын Айыл чарба, тамак-аш өнөр жайы жана мелиорация министрлигинин 2016-жылды жыйынтыктаган коллегиясында билдирди.

"Азыркы тапта айыл чарба тармагында ар бир район өз аймагында климаттык шартты эске алып, азык-түлүктүн кайсы түрүн айдаса түшүмдүүлүк мол болуп, киреше булагы артат, мына ушуга көңүл бурушу керек. Акимдер, райондогу айыл чарба тармагындагы адистер бул багытта дыйкан-фермерлер менен жолугушуп, аларга түшүндүрүү иштерин жүргүзбөй жатышат. Айыл чарба тармагын көтөрүүдө жергиликтүү бийлик өкүлдөрүнүн ролу чоң", - деди Абылгазиев.

Жыйында жалпысынан 4 маселе каралып, айыл чарба, тамак-аш өнөр жайы жана мелиорация министринин орун басары Эркинбек Чодуев республикадагы кайра иштетүү тармагы боюнча маалымат берди.

Министрдин орун басары 2017-жылы ишке аша турган тармактын негизги пландарына токтолуп, анда кооперативдерди күчөтүүгө, асыл тукумдуулукту арттырууга жана айдоо аянттарын кеңейтип, сугат суу менен камсыз кылууга басым жасаларын кошумчалады.

Быйыл 2016-жылга салыштырмалуу өсүмдүктөрдү өстүрүү 25 пайызга көбөйүп, анын эсебинен экпортко чыгарылуучу азык-түлүктөрдүн көлөмүн арттыруу пландалууда.