"Электр энергиясына ашыкча төлөм келди" деген абоненттер тиешелүү бөлүмдөргө кайрылып, так маалымат ала алышат

"Электр энергиясына ашыкча төлөм келди" деген абоненттер аймактардагы тиешелүү бөлүмдөргө кайрылып, кагаз жүзүндө канча электр энергиясын короткондугу тууралуу так маалымат ала алышат. Бул тууралуу бүгүн, 10-февралда маалымат жыйынында белгилүү болду.

"Бир колдонуучуга декабрь айында 2 миң сом келсе, кийинки айда 11 миң сом төлөм келген деп айтып жатасыңар. Андай чоң суммадагы айырмачылык болушу мүмкүн эмес. Андыктан мындай учурда ар бир колдонуучу "Түндүк электр" ишканасынын же аймактардагы тиешелүү бөлүмдөргө кайрылып, ар бир күнү, саат, мүнөтүнө чейин канча киловатт колдонгону тууралуу так маалыматты кагаз түрүндө ала алат. Себеби "акылдуу" эсептегичтерде баары жазылып, көзөмөлдөнүп турат.

Эгерде кандайдыр бир себептерден улам ашыкча төлөм болгону аныкталса, анда компания кийинки айдагы төлөмдөрдү кемитүү менен төлөп берет, албетте, дыкат текшерүүлөрдөн кийин", - дейт Улуттук энергохолдинг компаниясынын төрагасынын биринчи орун басары Нурлан Садыков.